আগামী ৯ নভেম্বৰ এয়াৰ ফোর্স ডে ফ্লাইপাষ্টৰ পূৰ্বে গুৱাহাটীতো যানবাহন নিয়ন্ত্ৰণ ঘোষণা কৰা হৈছে।

ভাৰতীয় বায়ুসেনাৰ “এয়াৰ ফোৰ্ছ ডে ফ্লাইপাষ্ট” উদযাপন উপলক্ষে আহোমগাঁও আৰক্ষীয়ে ৯ নৱেম্বৰলৈ আয়োজন কৰা কাৰ্যসূচী আগত গুৱাহাটী আৰক্ষী ট্রাফিকে এটা বিস্তৃত যানবাহন পৰামৰ্শ জাৰি কৰিছে। এই ফ্লাইপাষ্টটো পানবাজারস্থিত লাচিত ঘাটত আয়োজন কৰা হ’ব। লগতে ৫, ৬ আৰু ৮ নৱেম্বৰত মহড়াও চলি থাকিব।

গুৱাহাটী আৰক্ষী ট্রাফিকে জনসাধাৰণৰ ভিৰ, ভিভিআইপি আৰু বিশিষ্ট অতিথিসকলৰ উপস্থিতিৰ কথা চিন্তা কৰি ৮ আৰু ৯ নৱেম্বৰত ৰাতিপুৱা ৭ বজাৰ পৰা বিয়লি ৫ বজালৈ বিশেষ যানবাহন নিয়ন্ত্ৰণ আৰু পথবিভাজন ব্যবস্থা ঘোষণা কৰিছে। এই সময়ছোৱাত বাণিজ্যিক গাড়ী, ডেলিভাৰী ভেন, ট্ৰাক, আৰু ধীৰগতিৰ বাহন যেনে হাতগাড়ী, ৰিক্সা, ই-ৰিক্সা আদিকে এইচ.বি. ৰোড, এ.টি. ৰোড, ডি.জি. ৰোড, এম.জি. ৰোড, বি. বৰুৱা ৰোড আৰু জি.এন.বি. ৰোডত চলাচলৰ অনুমতি নাথাকিব।

বিশেষকৈ মাচখোৱা পইণ্টৰ পৰা চিফ জাষ্টিছৰ বঙলালৈকে এম.জি. ৰোডৰ অংশত কেৱল ভাৰতীয় বায়ুসেনাই জাৰি কৰা বৈধ পাৰমিটধাৰী গাড়ীসমূহকহে পুৱা ১১ বজাৰ পৰা বিয়লি ৫ বজালৈ চলাচলৰ অনুমতি দিয়া হ’ব।

যানবাহন বিভাজন ব্যৱস্থাৰ অধীনত, ভাৰতলুমুখৰ পৰা পানবাজার আৰু চান্দমাৰীলৈ যোৱা গাড়ীসমূহে এইচ.বি. ৰোড বা এ.টি. ৰোড ব্যৱহাৰ কৰিব লাগিব। আনহাতে, চান্দমাৰীৰ পৰা পানবাজার আৰু ভাৰতলুমুখলৈ যোৱা গাড়ীসমূহে পানবাজার ৰেইলৱে অভাৰব্ৰিজ (ROB)ৰ জৰিয়তে এ.টি. ৰোড ব্যৱহাৰ কৰিব লাগিব। লগতে, উজনবাজার আৰু লতাছিলৰ পৰা ভাৰতলুমুখলৈ যোৱা হালকা গাড়ীসমূহে লেম্ব ৰোড, এফ.চি. ৰোড, টায়েবুল্লা পইণ্ট আৰু জি.এন.বি. ৰোড দিয়া বিকল্প পথ ব্যৱহাৰ কৰিব লাগিব।

পাৰ্কিং নিয়মো কঠোৰভাৱে পালন কৰা হ’ব। ৰেড, ব্লু আৰু ইয়েল’ পাসধাৰী বাহনসমূহক কেৱল নির্ধাৰিত এলেকাতহে পাৰ্কিং কৰাৰ অনুমতি দিয়া হ’ব। এম.জি. ৰোড, এফ.এ. ৰোড, বি.আৰ.পি. ৰোড, এম.এল.এন. ৰোড, এ.আৰ.বি. ৰোড, এইচ.বি. ৰোড আৰু টিআৰপি ৰোডত কোনো ধৰণৰ পাৰ্কিংৰ অনুমতি নাথাকিব। লগতে টিআৰপি ৰোড, লাখী গলি, চেম্বাৰ ৰোড, এছ.আৰ.চি.বি. ৰোড, এছ.এছ. ৰোড, কেদাৰ ৰোড আৰু এম.এছ. ৰোডত কোনোও ভাৰী গাড়ী বা ট্ৰাক পাৰ্কিং কৰিব নোৱাৰিব।

গুৱাহাটী আৰক্ষী ট্রাফিকে নাগৰিকসকলক পূৰ্বেৰে যাত্ৰা পৰিকল্পনা কৰিবলৈ, নিয়মাবলী মানি চলিবলৈ, আৰু নিয়োজিত আৰক্ষী কৰ্মচাৰীসকলক সহযোগিতা কৰিবলৈ আহ্বান জনাইছে। এই ব্যৱস্থা সমূহৰ উদ্দেশ্য হৈছে এয়াৰ ফোৰ্ছ ডে ফ্লাইপাষ্টৰ সফল আয়োজন আৰু নাগৰিকৰ সুৰক্ষা নিশ্চিত কৰা।

গুৱাহাটী আৰক্ষীয়ে লগতে জনাইছে যে, এই আয়োজনটো ৰাজ্যৰ বাবে গৌৰৱৰ বিষয়, সেয়ে সকলো নাগৰিকে ট্ৰাফিক বিভাগৰ নির্দেশনা অনুসৰণ কৰি সুষ্ঠুভাৱে অনুষ্ঠানখন সম্পন্ন কৰিবলৈ সহযোগিতা জনাব লাগে।