২০২৫–২৬ৰ বাবে ১৫ এলএমটি চিনি ৰপ্তানিৰ অনুমতি কেন্দ্ৰৰ

২০২৫–২৬ চিনি বৰ্ষ (অক্টোবৰ–ছেপ্তেম্বৰ)ৰ বাবে ১৫ লাখ মেট্ৰিক টন (এলএমটি) চিনি ৰপ্তানিৰ অনুমতি কেন্দ্ৰে প্ৰদান কৰিছে। এই সম্পৰ্কে অতিৰিক্ত আদেশখন গ্ৰাহক সুৰক্ষা, খাদ্য আৰু লোকবিতৰণ মন্ত্রকে জাৰি কৰিছে। আদেশনামা অনুসৰি, ১৫ এলএমটি ৰপ্তানি কোটাক ২০২২–২৩, ২০২৩–২৪ আৰু ২০২৪–২৫ চিনি বৰ্ষত মিলৰ গড় উৎপাদনৰ ভিত্তিত অনুপাতিকভাৱে চিনি মিলসমূহৰ মাজত বণ্টন কৰা হৈছে। প্ৰতিগৰাকী মিলক এই তিন বছৰৰ গড় উৎপাদনৰ ৫.২৮৬% কোটাৰূপে দিয়া হৈছে। যোৱা বছৰে ভাৰত ১০ এলএমটি চিনি ৰপ্তানিৰ অনুমতি দিছিল। গতিবছৰৰ তুলনাত এই কোটাটো বেছি হলেও, ভাৰতীয় চিনি আৰু বায়ো–এনার্জি উৎপাদকসকলৰ সংগঠন (ISMA)-এ দাবী কৰা ২০ এলএমটি-তকৈ কম। সংগঠনটোৱে কৈছে যে ভাৰতৰ চিনি মজুত পৰিমাণ স্বস্তিদায়ক আৰু দেশ এই বৰ্ষত প্ৰায় ২০ লাখ টন চিনি ৰপ্তানি কৰিবলৈ সক্ষম।